SOMALI

Alle Waa Casiis Weyn

Allahaas Casiiskee ceeb aan lahaynoow
Kan cibaadadiisu xaqa tahay cid gudaase yar tahoow
Cabbirkiisa Allahaan carrabku koobi karinoow

Cirka Allaha taagee camiree asteeyoow
Cimrigeenna guud iyo calafkeenna kan hantoow
Caqligeenna Allihii cabiree qiyaasoow

Cidhibteenna Allihii Cilmigiisa ku ogoow
Cadaabtiisa Allahaan cidina celin karaynoow
Caydhiyo abaartana cidduu rabo ku taabtoow

Gaalku kan uu ku caasiyay ee uu cayna ugu daraayoow
Cadaw kan aanu dhibi karin culaysna aanu ku haynoow
Adigaa Casiis ahe cadaabtaada naga kori.

Ottawa, May. 1994
Jowhar Maidhane